Skrifað árið 2000 :
"Hljómsveitin Fídel varð til haustið 1999 og var hún þá skipuð þeim Janusi, Jón Atla og Búa. Þeir hittust í Mjölnisholti , skítapleisinu sem að hljómsveitir eru kúgaðar til að borga ólýsanlega háa leigu fyrir sameign með rottum. Fyrstu tónar hljómsveitinar voru aðalega instrumental langloku hjakk sem féll í misjafnan jarðveg hjá því hiski sem að varð á vegi þeirra á tónleikum, en þó voru tónleikarnir afar fáir. Þessir fáu tónleikar einkenndust af því að hafa alltaf einhvern nýjan gestaleikara með til að taka eitthvað eitthvað lag með bandinu.
Og það var einmitt þannig sem að Andri gerðist meðlimur sveitarinar, þegar að hann var beðin um að vera gestaleikari með þeim á tónleikum sem að Fídel átti að spila með Mínus. Andri var þá aðstoðar gítarleikari með Botnleðju eða Silt. Þessi æfing sem Andri tók með Fídel fyrir Mínus tónleikana gekk svona glymrandi vel að kallinn var umsvifalaust tekinn inn í bandið og leðjuni sturtað niður undir eins. Þarna var stefnan tekin á stanslausar æfingar og ekkert gefið eftir.
Tónlist hljómsveitarinnar þróaðist út í öllu kraftmeira rokk en þó afar furðulegt og sérstakt. Þessi nýi hljómur Fídel virtist heldur betur vera að virka, og fékk hljómsveitinn öllu meiri athygli en áður. Svo áður en hljómsveitin sjálf vissi að þá var komin söngur í nokkur lögin, því að strákarnir hafa nefnilega svolítið gaman af því að gaula í mækinn, en vilja þó ekki gera allt of mikið af því, allavegana enn sem komið er.
En núna í þessum skrifuðu orðum er Fídel að vinna að sinni fyrstu plötu, sem að er örugglega kominn út þegar að einhver af ykkur er að lesa þetta. Svo er það bara planið að semja fleiri lög og vonandi að gefa út fleiri plötur og overdosa á heroini svo að einhverjir í bandinu eignist nú einhverntíman aur. Því þá fyrst blómstrar frægðin"
Skrifað árið 2011 :
Hljómsveitin Fídel þótti gríðarlega efnileg á sínum tíma og sendi frá sér magnaða plötu, áður en hún hætti skyndilega. Nú hafa meðlimir hljómsveitarinnar dustað rykið af týndum upptökum.
„Það er bara leiðinlegt að enginn hefur heyrt þetta nema við og vinir okkar," segir útvarpsmaðurinn Andri Freyr Viðarsson.
Andri Freyr og félagar hans í hinni sálugu hljómsveit Fídel hafa dustað rykið af plötu sem þeir tóku upp skömmu áður en þeir hættu árið 2002. Plötusnúðurinn og hárgreiðslumaðurinn Jón Atli, fyrrverandi útvarpsmaðurinn Búi Bendtsen og trommarinn Janus Bragi Jakobsson voru í Fídel ásamt Andra.
Hljómsveitin þótti gríðarlega efnileg á sínum tíma og fyrsta plata hennar, New Entrance, skoraði hátt á listum yfir bestu plötur ársins 2002. Þá naut lagið Who Gives a Rat? talsverðra vinsælda á öldum ljósvakans.
„Þetta eru lög sem okkur langaði að eiga áður en við færum til fjandans," segir Andri Freyr um upptökurnar sem hafa ekki ennþá litið dagsins ljós. „Þetta eru átta lög og ég held að þau séu það sem við erum stoltastir af að hafa gert."
Spurður hvort platan komi út á næstunni segir Andri að þeir ætli ekki að drepa sig á því að reyna að koma henni til almennings. „En við gáfum Kimi Records útgáfuréttinn á plötunni í afmælisgjöf," segir hann. „Þannig að boltinn er hjá þeim. Þeir rétt ráða hvort þeir gefa hana út."
Þegar Fídel hafði tekið plötuna upp á sínum tíma var upptökunum komið í hendur sama aðila og hljómjafnaði fyrstu plötu hljómsveitarinnar. Hann býr erlendis og er búinn að vera með plötuna síðan, en var nú, rúmum átta árum síðar, að leggja lokahönd á hljómjöfnunina. „Hann var að klára þetta, þetta er hin íslenska Chinese Democracy," segir Andri og vísar í fræga plötu hljómsveitarinnar Guns n' Roses.
Andri er gríðarlega ánægður með afraksturinn og segir mikla angist og tilfinningu einkenna lögin. „Við erum að láta allt flakka," segir hann. „Við Jón Atli erum búnir að gæla við nöfn á plötuna. Okkur finnst Fídel – A Lame Name for a Great Band hljóma vel."
En eru endurkomutónleikar á döfinni?
„Nei, það hugsa ég ekki. Ég hugsa að það sé öllum sama. Kannski étum við eitthvað saman. Nonni er fluttur út, ég kann ekki á gítar, Búi er bara í bissness. En ég veit það ekki. Það má skoða allt fyrir réttu upphæðina."
